IMPORMASYON SA PAGKAPRIBADO PARA SA MGA BATANG PLAYER

Huling Na-update: Nobyembre 28, 2025

Sino ang Epic Games?

Kumusta! Kami ang Epic Games, at gumagawa kami ng mga kamangha-manghang laro gaya ng Fortnite Battle Royale, LEGO Fortnite Odyssey, Fortnite Festival, Fall Guys, Rocket League, Rocket Racing, at marami pang iba! Gumagawa rin kami ng mga kahanga-hangang tool na tumutulong sa mga tao na makagawa ng sarili nilang mga video game, at pinapatakbo rin namin ang Epic Games Store.

Tungkol saan ang page na ito?

Kapag naglaro ka ng mga video game at bumisita ka sa mga website, may ilang impormasyon tungkol sa iyo na nakokolekta. Tinutukoy ng page na ito kung anong impormasyon ang kinokolekta namin, bakit namin ito kinokolekta, at kung paano namin ito ginagamit para sa mga larong nilalaro mo, mga website na binibisita mo, at anumang iba pang online na serbisyo na ginagamit mo mula sa Epic Games.

Kung gusto mong malaman ang lahat ng detalye, humingi ng tulong sa iyong magulang o tagapag-alaga para basahin ang buong Patakaran sa Pagkapribado ng Epic Games.

Anong impormasyon ang kinokolekta namin?

Nangongolekta kami ng iba’t ibang uri ng impormasyon depende sa mga laro, website, o online na serbisyo na ginagamit mo at kung paano mo ginagamit ang mga ito.

Nakukuha namin ang impormasyon mo kapag ibinabahagi mo ito sa amin, gaya ng kapag ikaw ay:

• nag-sign up para sa isang account sa Epic (gaya ng paglalagay ng email at kaarawan mo),
• nakipag-ugnayan sa Suporta sa Player, at
• nagpadala ng ulat ng voice o text chat habang naglalaro ng aming mga laro.

Awtomatiko naming kinokolekta ang ilang impormasyon mo gamit ang mga espesyal na tool, gaya ng:

• anong device ang ginagamit mo (telepono, console, o computer),
• alin sa mga laro namin ang nilalaro mo, at
• impormasyong tumutulong sa amin na matukoy ang mga player na lumalabag sa aming mga patakaran.

Minsan ay nakukuha namin ang iyong impormasyon mula sa ibang mga kompanya, gaya ng PlayStation®, Microsoft Xbox, o Nintendo Switch, kapag nilaro mo ang aming mga laro gamit ang mga gaming console na iyon.

Paano namin ginagamit ang impormasyon mo?

Ginagamit namin ang impormasyon mo para:

• paganahin ang aming mga laro, website, at mga online na serbisyo,
• pahusayin ang aming mga laro, website, at mga online na serbisyo, at gawing mas masaya ang lahat,
• iayon sa iyo ang iyong karanasan o bigyan ka ng balita tungkol sa mga kaganapan, balita, o iba pang laro ng Epic na maaaring magustuhan mo (kung sapat na ang iyong edad o may pahintulot ka), at
• tumulong sa pagmamatyag sa mga bagay na tulad ng pandaraya at tumulong na protektahan ang mga tao.

Halimbawa: Sa Fortnite, kung wala ka pang 18 taong gulang, laging naka-on ang pag-uulat ng voice. Ibig sabihin, kung gumagamit ka ng chat at may lumabag sa aming mga patakaran (halimbawa, kung may mga nambu-bully o bastos na manlalaro), maaari kang magpadala sa amin ng ulat sa loob ng laro upang ma-review namin ang iyong voice chat at malaman namin kung ano ang nangyari

Kailan namin ibinabahagi ang impormasyon mo?

Maaari naming ibahagi ang impormasyon mo sa:

• iba pang kompanya ng Epic at mga kompanyang nagtatrabaho para sa amin upang tulungan kaming patakbuhin ang aming mga laro, website, at iba pang online na serbisyo (gaya ng iyong user ID o IP address),
• mga kompanya ng game console gaya ng PlayStation®, Microsoft Xbox, o Nintendo Switch kung lalaruin mo ang aming mga laro sa mga console na iyon,
• mga creator ng laro kung ida-download mo ang kanilang laro mula sa Epic Games Store upang malaro mo ito,
• mga online platform o store kung pipiliin mong i-link ang iyong account sa Epic sa mga ito (kung sapat na ang iyong edad o may pahintulot ka), at
• pulisya o iba pang tagapagpatupad ng batas upang makatulong na mapanatili kang ligtas, pati na rin ang iba pang tao gaya ng aming mga empleyado at mga player.

Anong mga pagpipilian ang mayroon ka tungkol sa impormasyon mo?

Maaari mong hilingin sa amin na:

• ayusin o baguhin ang impormasyon mo,
• bigyan ka ng kopya ng impormasyon mo, at
• burahin ang account mo.

Maaari ring gawin ng magulang/tagapag-alaga mo ang mga ito para sa iyo (depende sa edad mo).

Upang magpadala sa amin ng kahilingan, sundin ang mga tagubilin sa ibaba ng page na ito o tingnan ang buong Patakaran sa Pagkapribado ng Epic Games sa Seksyon 12 (Paano Ka Maaaring Makipag-ugnayan Sa Amin?) para sa aming impormasyon sa pakikipag-ugnayan.

Ano ang mga default na setting at pagkontrol ng magulang?

Kung wala ka pang 18 taong gulang, magsisimula ang iyong account sa Epic na may mahihigpit na setting ng pagkapribado. Ibig sabihin:

• ang mga tampok gaya ng chat, profile, at mga naka-personalize na rekomendasyon ay limitado o naka-off, at
• ang ilang setting ay maaari mong baguhin kapag mas matanda ka na.

Ang ilang tampok ay nangangailangan muna ng pahintulot mula sa iyong magulang/tagapag-alaga. Maaaring magtakda ang iyong magulang/tagapag-alaga ng Mga Pagkontrol ng Magulang gamit ang aming Account Portal.

Paano ka mananatiling ligtas online?

Upang matulungan kang magkaroon ng pinakamahusay na karanasan, narito ang ilang tip kung paano manatiling ligtas online:

• Kung maaari kang pumili ng display na pangalan, pumili ng masayang pangalan at huwag gamitin ang iyong totoong pangalan.
• Huwag kailanman ibahagi sa iba ang mga bagay tulad ng iyong totoong pangalan, numero ng telepono, tirahan, o anumang pribadong impormasyon.
• Mag-ingat sa chat; huwag magbahagi ng mga personal na bagay kahit sa mga kaibigang nakilala mo online. Maaari mong kontrolin ang mga tampok sa pakikipag-ugnayan sa iyong mga setting.
• Gumamit ng malakas na password na hindi madaling hulaan at panatilihing lihim ito.
• Kung sa tingin mo ay may ibang nakapasok sa iyong account, ipaalam kaagad ito sa amin.

Tingnan ang aming Sentro ng Kaligtasan at Seguriad para sa higit pang kapaki-pakinabang na tip kung paano manatiling ligtas online.

Paano ka maaaring makipag-ugnayan sa amin?

• Maaari mong bisitahin ang aming Sentro ng Suporta para sa mga sagot sa mga karaniwan na tanong.
• Maaari ka ring mag-email sa amin sa [email protected] kung may mga katanungan ka.
• Ang iyong magulang/tagapag-alaga ay maaaring magpadala sa amin ng mga tanong sa isang Kahilingan ng Magulang o Tagapag-alaga.